बहुजननामाऑनलाईन टीम – आंतरराष्ट्रीय स्तरावर क्रिकेटला प्रसिद्ध डकवर्थ-लुईस नियम देणार्यांपैकी गणिततज्ज्ञ टोनी लुईस यांचे वयाच्या 78 व्या वर्षी निधन झाले. इंग्लंड आणि वेल्स क्रिकेट बोर्डाने बुधवारी याबाबत जाहीर केले. क्रिकेटला डकवर्थ-लुईस-स्टर्न पद्धत देणार्या समितीचे ते सदस्य होते. मर्यादित षटकांच्या क्रिकेट सामन्यांमध्ये डकवर्थ-लुईस पद्धत वापरली जाते.
सिडनी येथे झालेल्या 1992 वर्ल्ड कपच्या उपांत्य सामन्यात पावसाने व्यत्यय आणल्यानंतर डकवर्थ लुईस सूत्र तयार करण्यात आले. इंग्लंडला पराभूत करण्यासाठी दक्षिण आफ्रिकेला 13 चेंडूंत 22 धावांची आवश्यकता होती. पावसाच्या व्यत्ययानंतर एका चेंडूवर 21 धावा करणे अशक्य होते. त्यानंतर काही काळातच हे सूत्र वापरण्यात आले. टोनी यांनी सहकारी गणिततज्ज्ञ फ्रँक डकवर्थ यांच्यासमवेत डकवर्थ-लुईस पद्धतीचा 1197 मध्ये शोध लावला. त्यानंतर आयसीसीने तो नियम 1999 मध्ये अधिकृतपणे स्वीकारला.
2014 मध्ये डकवर्थ-लुईस-स्टर्न सूत्रानुसार या नियमाचे नाव बदलण्यात आले होते. मर्यादित षटकांच्या सामन्यात पाऊस पडला तर या पद्धतीचा वापर केला जातो.या नियमावर अनेकदा टीका करण्यात आली होती. ऑस्ट्रेलियन आकडेवारीतज्ज्ञ स्टीव्हन स्टर्न यांनी 2014 मध्ये ‘स्कोअरिंग रेट’च्या आधारावर नियमात सुधारणा केली. 2014 मध्ये नाव बदलल्यानंतरही गणिताचे हे सूत्र जगभरात पावसाने व्यत्यय आणलेल्या सामन्यांमध्ये वापरले गेले.