बहुजननामा ऑनलाइन टीम – कोलकाता : पश्चिम बंगालमध्ये विधानसभा निवडणुकीपूर्वीच मुख्यमंत्री ममता बॅनर्जी यांच्या तृणमूल काँग्रेसला मोठा झटका बसला आहे. माजी केंद्रीयमंत्री आणि तृणमूल काँग्रेसचे राज्यसभा खासदार दिनेश त्रिवेदी यांनी बजेटवरील चर्चेदरम्यान पदाचा राजीनामा देण्याची घोषणा केली आहे. त्यांच्या या राजीनाम्यामुळे पक्षाला धक्का बसणार आहे.
संसदेचे वरिष्ठ सभागृह असलेल्या राज्यसभेत बजेटवर चर्चा सुरु होती. त्यादरम्यान, दिनेश त्रिवेदी यांनी भाष्य केले. त्यामध्ये ते म्हणाले, की ‘आम्ही जन्मभूमीसाठीच आहोत आणि मी काय करायचं, कसं करायचं, असे मला पाहवत नाही. एका पक्षात असाल तर मर्यादा असते. मात्र, आता मला पक्षात गुदमरल्यासारखं वाटतं आणि आम्ही काहीही करू शकत नाही. तिथं अत्याचार होत आहे, त्यामुळे माझा आत्मा मला सांगतोय राजीनामा द्या आणि बंगालच्या जनतेत जाऊन राहा’.
बंगालसाठी कायम काम करणार
दिनेश त्रिवेदी यांनी सांगितले, की ‘मी आज इथं (राज्यसभा) राजीनामा देत आहे. मात्र, देश आणि बंगालसाठी कायम काम करतोय आणि इथून पुढेही करत राहीन’.
भाजपमध्ये प्रवेश करण्याची शक्यता
दिनेश त्रिवेदी यांनी तृणमूल काँग्रेसच्या राज्यसभा सदस्यत्वाचा राजीनामा दिला आहे. आता ते येत्या दोन-तीन दिवसांत तृणमूल काँग्रेसच्या सदस्यत्वचा राजीनामा देतील, असा अंदाज आहे. तसेच आता ते कोणत्या पक्षात जाणार याकडेच सर्वांचे लक्ष लागले आहे. मात्र, काहींच्या मते ते भाजपमध्ये प्रवेश करतील, अशी शक्यता व्यक्त केली जात आहे.