पुणे – कोरेगाव भीमा येथे १ जानेवारी २०१८ रोजी झालेल्या दंगलीची चौकशी करण्यासाठी नेमण्यात आलेल्या कोरेगाव भीमा चौकशी आयोगाकडे आतापर्यंत १७७ शपथपत्रे दाखल झाली आहेत़ लोकांची मागणी लक्षात घेऊन शपथपत्र दाखल करण्यासाठी आयोगाने मुदत वाढवून दिली असून आता १६ जुलैपर्यंत लोकांना तसेच संघटनांना शपथपत्रे आयोगाकडे सादर करता येतील.
कोरेगाव भीमा येथे झालेल्या दंगलीच्या चौकशीसाठी शासनाने चौकशी आयोगाची स्थापना केली आहे़ कोलकाता उच्च न्यायालयाचे माजी मुख्य न्या. जे. एन. पटेल यांना विनंती करून त्यांच्या अध्यक्षतेत कमिशन आॅफ इन्क्वायरी अॅक्ट अंतर्गत दोन सदस्यीय समिती गठित करण्याचा निर्णय राज्य सरकारने घेतला आहे. या समितीला चौकशीसाठी चार महिन्यांचा कालावधी देण्यात आला आहे.
कोरेगाव भीमा येथे १ जानेवारी २०१८ रोजी घडलेल्या घटनांचा क्रम आणि त्यासाठी कारणीभूत असलेली परिस्थिती याची कारणमीमांसा करणे, ही घटना घडविण्यासाठी प्रत्यक्ष वा अप्रत्यक्षरीत्या व्यक्ती किंवा व्यक्तींचा गट किंवा संघटना कारणीभूत होत्या काय हे शोधणे, या घटनेमुळे निर्माण झालेली परिस्थिती हाताळण्यासाठी जिल्हा प्रशासनाने आणि पोलिस यंत्रणेने कायदा-सुव्यवस्था राखण्यासाठी केलेले नियोजन व तयारी पुरेशी होती काय याचा आढावा घेणे तसेच ही परिस्थिती हाताळण्यासाठी पोलिसांकडून योग्य कारवाई झाली होती काय आदींची चौकशी ही समिती करणार आहे.
चौकशी आयोगाने १२ मे रोजी जाहीर आवाहन करुन या घटनेबाबत शपथपत्राच्या स्वरुपात त्यांचे म्हणणे सादर करण्यास सांगितले होते़ त्यासाठी १० जूनपर्यंत मुदत होती़ या मुदतीत आयोगाकडे पुणे कार्यालयात १६९ शपथपत्रे तर मुंबईतील कार्यालयात ८ शपथपत्रे सादर झाली.
मुदतीत शपथपत्र सादर करता आले नसल्याने मुदत वाढवून देण्यासाठी मागणी अनेकांनी केली़ ही मागणी लक्षात घेऊन आयोगाने निवेदन सादर करण्याची मुदत १६ जुलै २०१८ पर्यंत वाढविली आहे़ ज्यांना अजूनही आपले म्हणणे सादर करायचे आहे, ते या एक महिन्याच्या कालावधीत ते सादर करु शकतात, असे कोरेगाव भीमा चौकशी आयोगाचे सचिव वि़ वी़ पळणीटकर यांनी कळविले आहे़