बहुजननामा ऑनलाईन टीम – खेळण्यांची खरेदी करताना ते कोणत्या वयोगटासाठी योग्य आहे हे स्पष्ट शब्दात नमूद केलेलं असतं. याकडे बारकाईने लक्ष द्यावं. कारण खेळण्यावर ‘सहा ते नऊ महिन्यांच्या बाळांसाठी’ असं नमूद केलेलं असेल तर हा खूपच कमी कालावधी आहे हे सहज लक्षात येईल. शिवाय मुलांची झपाट्याने वाढ होते आणि सतत नवनवीन शिकण्याचा ध्यास असणारी मुलं जुन्या खेळण्याकडे पहातही नाहीत. त्यामुळेच वाढत्या वयातही रुची टिकवून ठेवणारं, त्यांना आकर्षित करणारं खेळणं निवडणं चांगलं. विशेषत: महागडं खेळणं खरेदी करताना ही बाब प्रकर्षाने लक्षात घ्यावी.
सध्या हवेत उडणारी खेळणी खरेदी करण्याकडे अनेकांची पसंती असते. विमान, हेलिकॉप्टर, ड्रोन यासारखी खेळणी हवेत उडताना पाहून मुलं हरखून जातात. मात्र ही खेळणी प्रसंगी धोकादायकही ठरू शकतात. हवेत स्फोट झाल्यास खेळण्याच्या उडालेल्या तुकड्यांमुळे मुलं जखमी होऊ शकतात. त्यामुळेच अशी खेळणी खरेदी करताना दर्जाची तपासणी करावी. शक्यतो घराबाहेर नेऊन खेळू शकणार्या वयोगटातील मुलांनाच अशी खेळणी द्यावी. खेळून झाल्यावर खेळण्यातले सेल सुरक्षित ठिकाणी ठेवावे. बॅटरीवर चालणारी ट्रायसिकल खरेदी करताना मुलांसाठी हेल्मेटचीही खरेदी करावी.
खेळणी घेताना तपासणी करणं अत्यंत गरजेचं आहे. त्याचे मुलांच्या आरोग्यावर होणारे बरे-वाईट परिणामही अभ्यासायला हवे. उदाहरणार्थ एखादं मोठा आवाज करणारं खेळणं लहानग्यांच्या श्रवण शक्तीवर विपरित परिणाम करू शकतं. लहान मुलांना प्रत्येक वस्तू तोंडात घालण्याची सवय असते. त्यामुळे निकृष्ट दर्जाच्या प्लास्टिकपासून बनवलेली खेळणी तोंडात घातल्यास मुलांचं आरोग्य धोक्यात येऊ शकतं. एखाद्या कार्डगेममध्ये छोटे पसेस जुळवायचे असतील तर खेळता मुलांनी तोंडात घातल्याने ते घशात अडकण्याची दाट शक्यता असते. हे सगळे धोके आधीच ओळखायला हवेत, जेणेकरून आपल्या चिमुरड्यांची सुरक्षितता जपली जाईल.