बहुजननामा ऑनलाईन – सध्या कोरोनाच्या पार्श्वभूमीवर शाळा, महाविद्यालय बंद आहेत. फक्त ऑनलाईन शिक्षण सुरू केले आहे. दरम्यान, शैक्षणिक वर्ष २०२०-२१ पासून सावित्रीबाई फुले पुणे विद्यापीठाने शैक्षणिक शुल्कात वाढ केली होती. परंतु, वाढता कोरोना प्रादुर्भाव यामुळे विद्यापीठाच्या परीक्षा व मूल्यमापन मंडळाने प्रथम सत्राच्या परीक्षा शुल्क वाढीचा निर्णय थांबवला आहे. परीक्षा शुल्काबाबत कोणताही निर्णय घेण्यात आला नव्हता. तसंच कोरोनाची स्थिती पाहून सावित्रीबाई फुले पुणे विद्यापीठाने विद्यार्थ्यांकडून गतवर्षीप्रमाणे शुल्क घ्यावेत, असे आदेश महाविद्यालयांना देण्यात आले आहेत.
एकीकडे कोरोनासारखे जागतिक महामारीचे संकट आहे तर दुसरीकडे ओला दुष्काळ व कोरोना अशा दुहेरी संकटात पैशाची अडचण आहे. तसेच ऑनलाईन परीक्षा पद्धतीमध्ये खर्च कमी येत असताना, ऑफलाईन परीक्षापेक्षा ऑनलाईन परीक्षा पद्धती मध्ये फी जास्त का? असा प्रश्न उपस्थित करण्यात आला होता. दरम्यान, ऑगस्ट महिन्यापासून महाविद्यालयांनी ऑनलाईन शिक्षण सुरू केले आहे. पहिल्या सत्रातील बराचसा अभ्यासक्रम शिकवून पूर्ण झाला आहे. त्यावर जानेवारी महिन्यात पहिल्या सत्रांची परीक्षा होण्याची शक्यता आहे. परीक्षांबाबत विद्यापीठाने स्पष्टता आणलेली नसली तरी महाविद्यालयांनी विद्यार्थ्यांना परीक्षा शुल्क जमा करण्याचे आदेश दिले आहेत. यामध्ये गेल्यावर्षी पेक्षा जास्त शुल्क घेतले जात असल्याचे समोर आल्याने विद्यार्थ्यांनी या शुल्कवाढीस विरोध केला होता. या शुल्कवाढीमध्ये प्रकल्प फीच्या नावाखाली मोठ्या प्रमाणात वाढ केल्याचेही समोर आले आहे. याबाबतही खुलासा करण्याची मागणी केली होती
कोरोनाच्या संकटामुळे विद्यार्थ्यांच्या पालकांपुढे आर्थिक अडचणी निर्माण झाल्या आहेत. त्यामुळे विद्यार्थी हितासाठी २०२०च्या प्रथम सत्राच्या परीक्षांसाठी सर्व अभ्यासक्रमांच्या परीक्षा शुल्कात व अनुषंगिक शुल्कात वाढ करण्यात आलेली नाही. महाविद्यालयांनी गेल्यावर्षी प्रमाणे शुल्क आकारावे असे आदेश परीक्षा मंडळाचे डॉ. महेश काकडे यांनी दिले आहेत. हा निर्णय पुणे विद्यापीठाच्या परीक्षा मंडळाची बैठकीत घेण्यात आला .