पुणे : बहुजननामा ऑनलाइन – रुग्णालयात आलेल्या एका महिलेला कॅन्सर झाल्याचे सांगत तब्बल दिड कोटी रुपयांना गंडा घातल्याचा प्रकार समोर आला आहे. बचत, फंड यासोबतच सर्व बचत केलेले पैसे देहूनही डॉक्टर पैसे मागत असल्याने संशय आला. त्यानंतर महिलेच्या पतीने या डॉक्टर महिलेचा भांडा फोड केला.
याप्रकरणी डॉ. विद्या धनंजय गोद्रस (रा.वानवडी) असे गुन्हा दाखल झालेल्या आरोपीचे नाव आहे. याप्रकरणी सुषमा सुभाष जाधव (58,रा.वडगाव बुद्रुक) यांनी फिर्याद दिली आहे.
फिर्यादी या संरक्षण खात्यात ऑडिटर म्हणून कार्यरत आहेत. त्यांची एका मैत्रीणीमार्फत डॉ.विद्या यांच्याशी ओळख झाली होती. दरम्यान सुषमा यांनी अर्धशिसी व गुडघेदुखीवर 2017 मध्ये डॉ. विद्या यांच्याकडे उपचार घेतले होते. 2019 मध्ये त्यांना अन्न नलिकेचा त्रास होत असल्याने त्यांनी डॉ. विद्या यांच्याकडे संपर्क साधला. यावेळी विद्या यांनी आपण कॅनडाच्या एका आयुर्वेदीक संस्थेची फ्रेंचाईस घेतली. त्याचा अनेक रुग्णांना लाभ झाला असल्याचे सांगितले. सुषमा यांना व्हॉटसअपवर नाभिचा फोटो पाठवायला सांगितले. हे फोटो कॅनडातील संस्थेकडे पाठवून रिपोर्टमध्ये लिव्हर असायटीस झाल्याचे सांगितले. रुग्णाला अथवा कुटूंबीयांना रिपोर्ट गोपीयन असल्याने पुर्ण बरे होइपर्यंत दाखवत नसल्याचे सांगत उपचार सुरु करण्यास सांगितले. लवकर उपचार सुरु न केल्यास मृत्यू होऊ शकतो अशी भिती घातली. यामुळे घाबरलेल्या सुषमा यांनी तातडीने पैसे भरत उपचार सुरु केले. यानंतर सुषमा यांना औषधाची चिठ्ठी व रिपोर्ट न देता फक्त गोळ्या देण्यात येत होत्या.
यानंतर 2020 मध्ये पुन्हा नाभिचा फोटो पाठवायला सांगून लिव्हरच्या वरच्या भागात कॅन्सरची गाठ आल्याचे सांगितले. यासाठी 7 लाख रुपये आगाऊ मागितले. मात्र सुषमा यांच्याकडील सर्व पैसे संपल्याने त्यांनी पतीकडे पैसे मागितले. पतीने पैशाबाबत विचारणा केली असता, सुषमा यांनी उपचाराबाबत माहिती दिली. पतीने आजाराची कागदपत्रे व रिपोर्ट मागितले असता डॉ.विद्या यांनी ते दिले नाहीत. यामुळे त्यांचा संशय बळावल्याने सुषमा यांच्या पतीने एका वकिलासह डॉ.विदया यांची भेट घेतली. यावेळी डॉ.विद्या यांनी आजार बरा झाल्याशिवाय रिपोर्ट देता येत नसल्याचे सांगितले. अधिक तपास उपनिरीक्षक अहिवळे करत आहेत.