बहुजननामा ऑनलाइन टीम – अहमदनगर महापालिकेचा कारभार जिल्हाधिकारी डॉ. राजेंद्र भोसले यांच्याकडे होता. तत्कालीन आयुक्त श्रीकांत मायकलवार हे सेवानिवृत्त झाल्याने हे पद रिक्त होते. या पदावर शंकर गोरे यांची नियुक्ती करण्यात आली आहे. शंकर गोरे हे यापूर्वी जळगाव जिल्ह्यातील चाळीसगाव नगर परिषदेत मुख्य कार्यकारी अधिकारी होते.
शंकर गोरे यांना चाळीसगाव नगर परिषदेतून कार्यमुक्त करण्यात आले असून तसा आदेश शासनाचे उपसचिव कैलास बधान यांनी काढला आहे. शिवसेनेचे मंत्री एकनाथ शिंदे हे नगर दौऱ्यावर येणार आहेत. याच पार्श्वभूमीवर ही नियुक्ती झाल्याची चर्चा महापालिका वर्तुळात आहे.
श्रीकांत मायकलवार हे निवृत्त झाल्यानंतर मागील दीड महिन्यापासून हे पद रिक्त होते. जिल्हाधिकारी डॉ. भोसले हे प्रभारी म्हणून काम पाहत होते. मायकलवार यांनी जाताना अनेक निर्णय घेतले होते. हे निर्णय वादग्रस्त ठरल्याने जिल्हाधिकारी भोसले यांनी ते रद्द केले होते. आता शंकर गोरे यांची महापालिका आयुक्त पदी नियुक्ती करण्यात आली आहे. शंकर गोरे यांनी कोकण विभागात उपसंचालक म्हणून देखील काम पाहिले आहे.
