पुणे : बहुजननामा ऑनलाईन – पुणे जिल्ह्यातील बहुचर्चित लवासा प्रकल्प (Lavasa Project) खरेदीसाठी तीन कंपन्यांनी बोली लावली आहे. त्यापैकी पुण्यातील बिल्डर अनिरुद्ध देशपांडे ( Builder Anirudh Deshpande) यांच्या कंपनीने बोली लावली आहे. तसेच दिल्ली आणि गुरगाव येथील अन्य दोन कंपन्यांनीही बोली लावली आहे. पर्यावरण नियमांचे उल्लंघन करणे, बेकायदेशीर बांधकाम आदी कारणांमुळे चर्चेत आलेल्या लवासा प्रकल्पावर केंद्रीय पर्यावरण मंत्रालयाने कारवाईचा बडगा उगारल्यानंतर लवासा प्रकल्प आर्थिक डबघाईला आला. त्यामुळे या प्रकल्पाच्या विक्री व्यवहाराची चर्चा सुरु झाली आहे. खरेदीसाठी पुढे आलेल्या तीन कंपन्यांच्या बोलीवर येत्या डिसेंबरअखेर निर्णय होण्याची शक्यता आहे.
ज्येष्ठ नेते शरद पवार यांचा ड्रीम प्रोजेक्ट असलेला लवासा प्रकल्प प्रारंभीपासूनच वादाच्या भोवऱ्यात सापडला होता. या प्रकल्पाचा विक्री व्यवहार नँशनल कंपनी लॉ ट्रिब्युनल (एनसीएलटी) च्या अखत्यारीत चालू आहे. लवासा प्रकल्पाच्या खरेदीसाठी पुढे आलेल्या तीन कंपन्यांच्या बोलीवर येत्या डिसेंबरअखेर निर्णय होण्याची शक्यता आहे. लवासा प्रकल्प खरेदीसाठी पुढे आलेले पुण्यातील बांधकाम व्यावसायिक अनिरुद्ध देशपांडे यांनी या प्रकल्पात यापूर्वीही म्हणजे सन 2007 मध्येही गुंतवणूक केली होती. पुढे त्यांनी त्यांचे समभाग हिंदुस्थान कन्स्ट्रक्शन कंपनीला विकले होते. दरम्यान लवासा कॉर्पोरेशन लिमिटेड या कंपनीला विविध वित्तसंस्थांची सुमारे साडेपाच हजार कोटी रुपयांची देणी आहेत. तसेच ‘लवासा’त मालमत्ता खरेदी केलेल्यांचेही सुमारे चारशे कोटी रुपयांचे देणे असल्याचे सांगितले जाते. अमेरिकेतील फंड कंपनीसोबत मी लवासा प्रकल्प खरेदी करण्यासाठी बोली लावली आहे. मात्र व्यवहाराची ही प्रक्रिया खूप वेळखाऊ असल्याचे सिटी कॉर्पोरेशनचे अनिरुध्द देशपांडे यांंनी सांगितले.
