मुकेश अंबानी यांना जीवे मारण्याची धमकी दिली नाही; ‘जैश उल हिंद’ संघटनेच्या खुलाशाने नवा संभ्रम

mukesh ambani

मुंबई : बहुजननामा ऑनलाइन – उद्योगपती मुकेश अंबानी यांच्या अँटिलीया निवासस्थाजवळ स्फोटके असलेल्या स्कॉर्पिओची जबाबदारी जैश उल हिंद या दहशतवादी संघटनेने स्वीकारल्याची रविवारी दिवसा मिळालेली माहिती खोटी असल्याचे त्या संघटनेने रात्री उशिरा स्पष्ट केल्याचा दावा मुंबई पोलिसांनी केला आहे. त्यामुळे या स्फोटकामागे नक्की कोण आहे, याचा संभ्रम कायम आहे. संघटनेच्या टेलिग्राम अ‍ॅपवरील पेजवरुन ही माहिती देण्यात आली होती. मात्र, हा तपास भरकटवण्याचा प्रयत्न असल्याचे सांगत पोलिसांनी तिला दुजोरा दिला नव्हता.

याबात एक पेज टेलिग्रामवर प्रसारित करण्यात आले आहे. त्यात जैश उल हिंद या संघटनेने म्हटले आहे की आमचा लढा संघ -भाजपशी आहे. आमचा लढा धर्मनिरपेश लोकशाही रा़ स्व़ संघ, भाजपच्या विचारधारेशी आहे. मोदींच्या मुस्लिमविरोधी भूमिकेशी आहे. उद्योगपतींशी नाही. असे सांगत या संघटनेने या स्फोटकांशी असलेला संबंध नाकारला आहे. टेलिग्रामवरील पोस्टबाबत त्यांनी भारतीय गुप्तचर यंत्रणांनाच जबाबदार धरले आहे. संघटनेचे हे पेज पोलिसांनी आणि भारतीय गुप्तचरांनी नियंत्रित केले असल्याचे या संदेशात म्हटले आहे. मुंबई पोलिसांनी ही पोस्ट हटविली आहे.

यापूर्वी टेलिग्रामवर या स्फोटकाबाबतची जबाबदारी स्वीकारणारी पोस्ट टेलिग्रामवर टाकण्यात आली होती. त्यात मुकेश अंबानी यांच्या निवासस्थानाबाहेर स्फोटकांनी भरलेली कार सोडणारा सुरक्षित ठिकाणी पोहोचला आहे. हा फक्त ट्रेलर आहे. पिक्चर अजून बाकी आहे, असे म्हटले होते. बिटकॉईनच्या स्वरुपात मुकेश अंबानी यांच्याकडून रक्कमेची मागणी करीत आमच्या मागण्या मान्य केल्या नाहीत तर पुढच्या वेळेस ही कार तुमच्या मुलांच्या मागे असेल, अशी धमकी त्यात होती. तुम्हाला जमत असेल तर आम्हाला थांबवून दाखवा, असे आव्हानही तपास यंत्रणांना त्यात देण्यात आले होते. मात्र त्याचवेळी स्कॉर्पिओमध्ये सापडलेल्या धमकी पत्रात पैशांची मागणी करण्यात आली नव्हती.