बहुजननामा ऑनलाइन टीम –जगातील अनेक देशांकडून कर्ज घेणाऱ्या पाकिस्तानवर आता देशातील अनेक गोष्टी विकायची आणि गहाण ठेवयाची वेळ आली आहे. पाकचे पंतप्रधान इम्रान खान (Imran Khan) आता राजधानी इस्लामाबादमधील सर्वात मोठ्या पार्कला गहाण ठेवणार आहेत. या पार्कला गहाण ठेवल्यानंतर त्याला 500 अब्ज डॉलरचं कर्ज प्राप्त होईल अशी त्यांना आशा आहे. इस्लामाबादमधील एफ 9 सेक्टरमध्ये हे पार्क आहे. येत्या मंगळवारी होणाऱ्या इम्रान खान सरकारच्या कॅबिनेट बैठकीत या पार्कला गहाण ठेवण्याच्या प्रस्तावावर चर्चा होणार आहे अशी माहिती आहे.
सर्वात मोठं पार्क गहाण
पाकमधील डॉन या वृत्तपत्रानं दिलेल्या माहितीनुसार, आर्थिक अडचणीमुळं सरकारनं बाँड जाहीर करण्याच्या माध्यमातून 500 अब्ज रुपयांचं कर्ज प्राप्त करण्यासाठी राजधानीमधील एफ 9 पार्कला गहाण ठेवण्याचा निर्णय घेतला आहे. राजधानी प्राधिकरणानं यासंबंधीचे हरकत प्रमाणपत्र दिले आहे. याआधीही पाकनं आपल्या अनेक संस्था, इमारती आणि रस्ते राष्ट्रीय आणि आंतरराष्ट्रीय बाँड्सच्या माध्यमातून कर्ज प्राप्त करण्यासाठी तारण ठेवले आहेत.
जिन्नांच्या बहिणींच्या नावे पार्क
एफ 9 हे पार्क फातिमा जिन्ना पार्क म्हणूनही ओळखलं जातं. 759 एकर जमिनीवर हे पार्क विस्तारलेलं आहे. हे सार्वजनिक मनोरंजन पार्क पाकमधील सर्वात मोठ्या बहरलेल्या पार्कपैकी एक आहे. मदार-ए-मिलत फातिमा जिन्ना यांच्या नावावरून याचं नाव ठेवलं गेलं आहे, ज्या पाकिस्तानच्या संस्थापक मोहम्मद अली जिन्ना यांच्या भगिनी आहेत. आर्थिक कोंडी झाल्यानं पाकनं अनेक देशांकडून कर्ज घेतलं आहे. त्यांची आर्थिक स्थिती खूप वाईट आणि नाजूक झाली आहे. कोरोनामुळं तर पाकचं कंबरडं मोडलं आहे.
