Suresh Dhas On Walmik Karad | वाल्मिक कराडच्या सीसीटीव्ही फुटेजवर सुरेश धसांचे भाष्य; म्हणाले – ‘माझे आरोप….’

बीड : Suresh Dhas On Walmik Karad | सरपंच संतोष देशमुख हत्या प्रकरणातील (Santosh Deshmukh Murder Case) कथित आरोपी वाल्मिक कराड आणि इतर हल्लेखोरांचा एक सीसीटीव्ही फुटेज समोर आला आहे. यामध्ये निलंबित झालेले पीएसआय राजेश पाटील (PSI Rajesh Patil), प्रतीक घुले, सुदर्शन घुले आणि त्यांचे मित्र दिसून येत आहेत. यावरून आता भाजपा आमदार सुरेश धस यांनी भाष्य केले आहे. या व्हिडिओमुळे या प्रकरणाला वेगळे वळण लागलेले असताना धसांची प्रतिक्रिया चर्चेत आली आहे.

सुरेश धस म्हणाले, ” मी जे पुरावे दिले होते ते एसआयटीने समोर आणले आहेत. माझे आरोप हवेतील नव्हते. या लोकांचा खंडणी, हत्येशी आकाचा संबंध आहे, हे यातून सिद्ध होतंय. अवादा कंपनींच्या शिंदेंना २९ नोव्हेंबरला गाडीत घालून पाथर्डीपर्यंत नेलं होतं. तिथून मारत मारत येथे आणलं, त्यानंतर त्याला सोडून दिलं. त्याचं हे सीसीटीव्ही फुटेज आहे. त्यामुळे १०१ टक्के आका, विष्णू चाटे, सुरेश आंधळे हे आरोपी आहेत.”

ते पुढे म्हणाले, ” जे गुन्हा करतात ते तो मी नव्हेच असं म्हणतात. पण आता हा मी आहेच हे दिसतंय. मी जे म्हणालो होतो त्याला पुष्टी मिळाली आहे. हे आरोपी खरे आहेत. अजूनही बरेच आरोपी आहेत, हे सोटमुळं सापडली आहेत. अजून आंगतुक मुळं आहेत. आंगतुक मुळं अजून राहिली आहेत, त्यांचाही बंदोबस्त व्हावा अशी आमची मागणी आहे. त्यांची रीतसर नावं एसआयटीला देऊ”, असे सुरेश धस यांनी म्हंटले आहे.

व्हायरल सीसीटीव्ही फुटेजमध्ये नेमकं काय आहे ?

व्हायरल सीसीटीव्ही फुटेज विष्णू चाटे याच्या केज येथील कार्यालयाबाहेर आहे. २९ नोव्हेंबरला वाल्मिक कराड या कार्यालयात आला होता. यावेळी वाल्मिक कराड याच्यासह संतोष देशमुख यांची निर्घृणपणे हत्या करणारे प्रतीक घुले, सुदर्शन घुले आणि त्यांचे मित्र दिसत आहेत. विशेष म्हणजे संतोष देशमुख हत्या प्रकरणात संशयास्पद भूमिका राहिलेले आणि निलंबित झालेले पीएसआय राजेश पाटील हे देखील वाल्मिक कराड यांना भेटल्याचे सीसीटीव्ही फुटेजमध्ये दिसत आहे.