बहुजननामा ऑनलाइन टीम – राज्यात महाविकास आघाडीचे सरकार आल्यापासून राष्ट्रवादी काँग्रेसला सुगीचे दिवस आले आहेत. २०१९ च्या विधानसभा निवडणुकीपूर्वी गळती लागलेल्या राष्ट्रवादीत (NCP)आता सतत इनकमिंग सुरु झाले आहे. आता ‘एमआयएम’च्या माध्यमातून सोलापुरात शहरात आपल्या नावाचा डंका वाजवणारे तौफिक शेख यांनी करमाळ्याचे आमदार संजय शिंदे यांच्यासोबत सोमवारी (४ जानेवारी) उपमुख्यमंत्री अजित पवार, कॅबिनेट मंत्री नवाब मलिक यांची भेट घेतली. लवकरच प्रदेशाध्यक्ष जयंत पाटील यांची वेळ घेऊन तौफिक शेख हे आपल्या नगरसेवकांसोबत सोलपुरातच राष्ट्रवादीत प्रवेश करणार असल्याची माहिती मिळत आहे.
दुसरीकडे, महापालिकेतील शिवसेनेचे विरोधी पक्षनेते महेश कोठे हे सुद्धा राष्ट्रवादी काँग्रेसचे सर्वेसर्वा शरद पवार यांची भेट घेणार असल्याची चर्चा सुरु आहे. भाजपचे अडचणीत आलेले उपमहापौर यांच्या जागी दुसऱ्या नगरसेवकाचा शोध सुरु असताना, शिवसेनेचा महापालिकेतील विरोधी पक्षनेताही बदलण्याचे ठरले आहे.
‘एमआयएम’ची ताकद विभागली
महापालिकेतील ‘एमआयएम’च्या दहा नगरसेवकांना सोबत घेऊन तौफिक शेख यांनी शहरातील विविध प्रश्नांवर पालिकेतील सत्ताधाऱ्यांना धारेवर धरले. पंरतु, पक्षातील अंतर्गत वादामुळे त्यांनी राष्ट्रवादीत जाण्याचा निर्णय घेतला. पदवीधर व शिक्षक विधानपरिषद निवडणुकीवेळी शेख यांनी महाविकास आघाडीला मदत केली. आता सर्व नगरसेवक राष्ट्रवादीत प्रवेश करण्याचे ठरले असताना चार नगरसेवकांनी पक्ष न सोडण्याचा निर्धार केला आहे.
महेश कोठेंचा राष्ट्रवादी प्रवेशातील अडथळा दूर
शिवसेनेने विधानसभेला डावलल्यानंतर महेश कोठे यांनी शहर मध्य मतदारसंघातून बंडखोरी करत अपक्ष निवडणूक लढवली. तेव्हा काही नगरसेवकांना सोबतीला घेत त्यांनी स्वतंत्र गट स्थापन करण्यास परवानगी द्यावी, अशी मागणी विभागीय आयुक्तांकडे केली होती. तो निर्णय आता सुटला असून, कोठे यांना घेऊन आपण चार-पाच दिवसांत राष्ट्रवादीचे सर्वेसर्वा शरद पवार यांची भेट घेणार असल्याची माहिती जिल्हाध्यक्ष बळीराम साठे यांनी दिली आहे.
‘शहर उत्तर’वर महेश कोठेंचा डोळा
महाविकास आघाडीचे सरकार राज्यात असल्याने येणाऱ्या विधानसभा निवडणुकीत शहर मध्य या विधानसभा मतदारसंघातून आपल्याला संधी मिळणार नाही याची खात्री कोठेंना झाली आहे. त्याअनुषंगाने आगामी विधानसभा निवडणूक लढण्यासाठी शहर उत्तर मतदारसंघ आपल्यासाठी योग्य राहील, असा विश्वास कोठे यांना वाटू लागला आहे. म्हणूनच शहर उत्तर मतदारसंघातून राष्ट्रवादी कॉंग्रेसतर्फे आपण निवडणूक लढवू शकतो, या हेतूने कोठे हे राष्ट्रवादीत प्रवेश करणार असल्याची चर्चा आहे.
