मुंबई : बहुजननामा ऑनलाईन – राष्ट्रवादी काँग्रेसचे प्रमुख आणि नुकत्याच पार पडलेल्या विधानसभा निवडणुकीत नायक ठरलेले शरद पवार यांचा आज ८० वा वाढदिवस आहे. राजकारणासोबतच साहित्य, नाट्य, कला, चळवळ, अर्थकारण, समाजकारण, विचारवंत, प्राध्यापक, डॉक्टर, वकील, इंजिनियर अशा अनेक क्षेत्राची खडानखडा माहिती ठेवणारे, त्यांच्या क्षेत्रात काय चालले आहे याविषयी स्वत:ची पक्की बैठक असणारे नेतृत्व म्हणजे शरद पवार होय.
विधानसभा निवडणुकीनंतर शरद पवारांचे फॅन फोल्लोवर्स वाढले आहेत आणि त्यामध्ये तरुणांची संख्या आणखीच जास्त वाढली आहे. प्रत्येकाला आपल्या आवडत्या नेत्यासोबत फोटो काढण्याची इच्छा असते. मोबाईलला फ्रन्ट कॅमेरा आल्यापासून सेल्फी फोटो उदयास आला. मात्र सेल्फी या प्रकाराचा शरद पवार यांना चांगलाच राग येतो. किंबहुना शरद पवार यांच्यासोबत काढलेले सेल्फी फारसे पाहायला मिळत नाही.
पुण्यात झालेल्या एका कार्यक्रमाच्या वेळी शरद पवार व्यासपीठाकडे जात असताना एक तरुण शरद पवार यांच्यासोबत सेल्फी काढण्याचा प्रयत्न करत होता. ही बाब शरद पवार यांच्या लक्षात येताच त्यांनी त्या तरुणाला खडसावले होते. या व्यतिरिक्त मोदी बागेतील शरद पवार यांच्या निवासस्थानी सामाजिक क्षेत्रातील मंडळी काही दिवसांपूर्वी चर्चेसाठी गेली होती. त्यावेळी पवारांनी तासभर या मंडळीशी चर्चा केली. चर्चा आटोपताच सर्वांनी पवारांसोबत फोटो काढले होते. पवारही सर्वांना फोटो काढताना प्रतिसाद देत होते. मात्र त्याचवेळी एका तरुणाने पवार यांच्यासोबत सेल्फी काढण्याचा प्रयत्न केला होता. त्यावेळी देखील शरद पवार संतापले होते.