Rahul Gandhi | राहूल गांधी यांना पुणे न्यायालयात हजर रहाण्यास मुदतवाढ !!

December 2, 2024

पुणे– Rahul Gandhi | पुणे येथील प्रथमवर्ग न्यायाधीश अमोल श्री. शिंदे (Judge Amol Shinde) यांच्या न्यायालयात फिर्यादी सात्यकी सावरकर (Satyaki Savarkar) यांनी लोकसभेचे विरोधी पक्षनेते राहूल गांधी यांनी लंडन येथील एका कार्यक्रमात सावरकर यांच्या विषयी बदनामी होईल असे वक्तव्य केले होते. या प्रकरणी राहूल गांधी यांच्या विरोधात बदनामीचा खटला दाखल करण्यात आला असून त्याची आज पुण्यातील न्यायालयात सुनावणी झाली.

           बदनामीच्या या खटल्यात राहुल गांधी यांनी न्यायालयात उपस्थित रहावे म्हणून पुणे येथील न्यायालयाने राहूल गांधी यांना समन्स जारी केले होते. दि.१८/११/२०२४ रोजी पुणे न्यायालयात हजर रहावे असे आदेश दिले होते. मागील तारखेस फिर्यादी सावरकर यांनी राहूल गांधी यांना पोस्टाद्वारे पाठविलेले समन्स राहूल गांधी यांच्या दिल्लीतील पत्यावर मिळाले असल्याचे फिर्यादी सावरकर यांच्या वकिलांकडून न्यायालयात सांगण्यात आले होते. राहूल गांधी यांना समन्स मिळाल्याचे कागदपत्रही फिर्यादी यांच्या वकीलांनी न्यायालयात हजर केले होते. पुणे न्यायालयाचे समन्स मिळूनही राहूल गांधी न्यायालया समोर हजर झालेले नाहीत म्हणून राहूल गांधी यांना जामीनपात्र वाॅरंट काढावे असा अर्ज फिर्यादी यांच्या वकिलांकडून न्यायालयात मागील तारखेस दि.१८/११/२०२४ रोजी दाखल केला होता.

               राहूल गांधी यांचे वकील अ‍ॅड. मिलींद दत्तात्रय पवार (Adv Milind Pawar) यांनी राहूल गांधी यांच्यावतीने न्यायालयात मागील तारखेस दि.१८/११/२०२४ रोजी अर्ज दाखल केला होता. राहूल गांधी हे विद्यमान खासदार व लोकसभेचे विद्यमान विरोधीपक्ष नेते आहेत. देशातील विविध निवडणुकीच्या पाश्र्वभूमीवर ते देशभर दौऱ्यावर होते. पुणे न्यायालयाचे समन्स त्यांच्या कार्यालयात मिळाले आहे. परंतु श्री. राहुल गांधी दौर्‍यावर व्यस्त असल्याने न्यायालयात हजर राहू शकत नव्हते असा अर्ज अ‍ॅड. मिलिंद दत्तात्रय पवार यांनी न्यायालयात दि. १८/११/२०२४ रोजी केला होता. अ‍ॅड. पवार यांनी केलेला अर्ज न्यायालयाने मंजूर केला होता. दिनांक २ डिसेंबर २०२४ रोजी राहूल गांधी यांना न्यायालया समोर प्रत्यक्ष हजर ठेवा असे राहूल गांधी यांचे वकील अ‍ॅड. मिलिंद दत्तात्रय पवार यांना न्यायालयाने आदेश देऊन खटला दि. २/१२/२०२४ पर्यंत तहकूब केला होता.

               राहुल गांधी हे विद्यमान खासदार व लोकसभेचे विद्यमान विरोधीपक्ष नेते आहेत. सध्या लोकसभेचे हिवाळी अधिवेशन चालू आहे. अनेक महत्त्वपूर्ण बिलं संसदेत चर्चेसाठी येणार आहेत. श्री. राहुल गांधी हे एका महत्वाच्या पदावर असल्याने त्यांना लोकसभेच्या अधिवेशनात देशहिता करिता ऊपस्थीत रहाणे आवश्यक आहे. त्यामुळे श्री. राहुल गांधी यांना न्यायालयात गैरहजर रहाण्याची परवानगी मिळून न्यायालयात व्यक्तीशः ऊपस्थीत रहाण्यास मुदतवाढ मिळावी असा अर्ज न्यायालयात राहुल गांधी यांचे वकील अ‍ॅड. मिलिंद दत्तात्रय पवार यांनी न्यायालयात सुनावणी दरम्यान केला.

राहूल गांधी यांचे वकील अ‍ॅड. मिलिंद दत्तात्रय पवार यांनी केलेल्या अर्जावर दोन्ही बाजूंचा युक्तिवाद ऐकून न्यायाधीश अमोल श्री. शिंदे यांच्या आदेशानुसार पुढील सुनावणी दि. १०/०१/ २०२५ होणार आहे.