Pune Pimpri Chinchwad Crime News | भोसरी, दिघी, चिखली परिसरात मोटारसायकली चोरणाऱ्या सराईत चोरट्याकडून 15 मोटारसायकल हस्तगत

पिंपरी : Pune Pimpri Chinchwad Crime News | भोसरी, दिघी, चिखली परिसरात मोटारसायकली चोरणार्‍या सराईत चोरट्याला भोसरी पोलिसांनी अटक करुन त्याच्याकडून ३ लाख २० हजारांच्या १५ मोटारसायकली जप्त केल्या आहेत. स्वप्निल भागवत अहिरे (वय २४, रा. गवळीनगर, भोसरी) असे या चोरट्याचे नाव आहे. (Arrest In Vehicle Theft)

शहरातील वाहनचोरीला आळा घालण्यासाठी भोसरी पोलीस ठाण्यातील तपास पथकातील पोलीस उपनिरीक्षक बालाजी जोनापल्ले व पोलीस अंमलदार यांनी मोटारसायकल चोरीचे गुन्हे घडलेल्या ठिकाणांना भेटी देऊन परिसरातील सीसीटीव्ही फुटेजचा बारकाईने तपास केला. सातत्याने विविध ठिकाणचे सीसीटीव्ही फुटेज तपासत. तसेच त्या ठिकाणी सापळे लावून व मोटारसायकल चोरी करणार्‍या चोरट्यांबाबत माहिती प्राप्त केली.

वरिष्ठ पोलीस निरीक्षक विश्वनाथ चव्हाण यांच्या आदेशाने तपास पथकातील पोलीस अंमलदारांच्या वेगवेगळ्या टीम तयार करुन पेट्रोलिंग करुन संशयित वाहन्याची तपासणी करीत असताना पोलीस अंमलदार गारोळे व नरवडे यांना एक जण संशयितरित्या मोटारसायकलवरुन जात असल्याचे दिसले. त्यांनी त्याला ताब्यात घेऊन मोटारसायकल बाबत विचारपूस केली असता तो उडवा उडवीची उत्तरे देऊ लागला. तेव्हा त्यांनी पोलीस उपनिरीक्षक बालाजी जोनापल्ले व इतरांना गावजत्रा मैदान येथे बोलावून घेतले. स्वप्निल भागवत अहिरे हा रेकॉर्डवरील गुन्हेगार असल्याचे लक्षात आल्यावर त्याच्याकडे कौशल्यपूर्ण तपास केला. तेव्हा त्याने व त्याचा साथीदार बबन हरीभाऊ वाघमारे (रा. चिखली) या दोघांनी भोसरी, दिघी, चिखली, इंद्रायणीनगर या परिसरातून १५ मोटारसायकली चोरल्याची कबुली दिली. त्याच्याकडून १५ मोटारसायकली हस्तगत केल्या आहेत. त्यात भोसरी पोलीस ठाण्यातील ७ गुन्हे, दिघी पोलीस ठाण्याकडील १ गुन्हा, चिखली व भोसरी एमआयडी पोलीस ठाण्याकडील प्रत्येकी एक गुन्हे उघडकीस आले आहेत. पाच गुन्ह्यातील मोटारसायकलीच्या मालकांची ओळख अद्याप पटायची आहे.

स्वप्निल भागवत अहिरे हा अट्टल मोटारसायकल चोरटा असून त्याने पिंपरी चिंचवड, नाशिक शहर पोलीस आयुक्तालयात यापूर्वी मोटारसायकल चोरीचे गुन्हे केले आहेत.

ही कामगिरी पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी, पोलीस उपायुक्त स्वप्ना गोरे, सहायक पोलीस आयुक्त सचिन हिरे, वरिष्ठ पोलीस निरीक्षक विश्वनाथ चव्हाण, पोलीस निरीक्षक भारत शिंदे यांच्या मार्गदर्शनाखाली पोलीस उपनिरीक्षक बालाजी जोनापल्ले, सहायक फौजदार राकेश बोयणे, पोलीस हवालदार मुळे, पोलीस अंमलदार नवनाथ पोटे, प्रकाश भोजणे, स्वामी नरवडे, सागर जाधव, प्रभाकर खाडे, सचिन सातपुते, महादेव गारोळे, ज्ञानेश्वर साळवे, अनिल जोशी, विशाल काळे यांनी केली आहे.