बहुजननामा ऑनलाइन टीम – खराडी परिसरात कॉल सेंटरमध्ये(Call center girl) काम करणाऱ्या तरुणीचा पाठलाग करुन तिचे अपहरण करुन बलात्कार केल्याची धक्कादायक घटना समोर आली आहे. पीडित मुलगी कामावरून घरी जात असताना दुचाकीवरुन आलेल्या एका व्यक्तीने टिंगरेनगर येथे तरुणीला अडवले. जबरदस्तीने दुचाकीवरून खराडी परिसरात घेऊन गेला. त्यानंतर तिच्यावर बलात्कार केला. ही खळबळजनक घटना गुरुवारी (दि.31) पहाटे तीन ते चार वाजताच्या दरम्यान घडली. याप्रकरणी विश्रांतवाडी पोलीस ठाण्यात गुन्हा दाखल केला आहे.
याप्रकरणी धानोरी परिसरात राहणाऱ्या एका 20 वर्षीय तरुणीने विश्रांतवाडी पोलीस ठाण्यात फिर्याद दिली आहे. पीडित तरुणीच्या फिर्यादीवरुन पोलिसांनी दुचाकीस्वार तरुणाविरोधात गुन्हा दाखल केला आहे. पोलिसांनी दिलेल्या माहितीनुसार, पीडित तरुणी खराडी परिसरातील एका कॉल सेंटरमध्ये काम करते. पहाटे तीनच्या सुमारास ती दुचाकीवरुन धानोरीला घरी जात होती. ती घरी निघाल्यानंतर तिचा आरोपीने पाठलाग सुरु केला. तिला टिंगरेनगर परिसरात अडवून मारहाण केली. त्यानंतर तिला त्याच्या दुचाकीवर बसवून खराडी परिसरातील निर्मनुष्य ठिकाणी घेऊन गेला.
निर्मनुष्य ठिकाणी आरोपीने तरुणीवर बलात्कार केला. त्यानंतर आरोपीने तिला येरवडा येथील गुंजन चौक परिसरात आणून सोडले. तिने मित्राला या घटनेची माहिती दिली. त्यानंतर त्यांनी विश्रांतवाडी पोलीस ठाण्यात फिर्याद दिली. या प्रकरणी पोलिसांनी अपहरण, बलात्कार, मारहाण केल्या प्रकरणी गुन्हा दाखल केला आहे.