Pune Crime News | पुणे : पूर्व वैमनस्यातून गुंडांच्या टोळक्याने तरुणावर कोयत्याने वार करुन जीवे मारण्याचा प्रयत्न

पुणे : Pune Crime News | सात महिन्यापूर्वी झालेल्या भांडणाच्या कारणावरुन गुंडांच्या टोळक्याने तरुणाचा पाठलाग करुन त्याला घराबाहेर पकडले. त्याच्यावर कोयत्याने वार करुन जीवे ठार मारण्याचा प्रयत्न केला. पोलिसांनी तिघा गुंडांसह चार जणांना अटक केली आहे. (Attempt To Murder)

याबाबत उमर अली गफार शेख (वय २२, रा. मोची गल्ली, ए डी कॅम्प चौक) यांनी समर्थ पोलीस ठाण्यात फिर्याद दिली आहे. त्यावरुन पोलिसांनी दानिश आसीफ शेख (वय २०, रा. हार्मेन कॉम्प्लेक्स, भवानी पेठ), सईद अमजदखान पठाण (वय २१, रा. पत्र्याची चाळ, न्यू नाना पेठ), हिदायत शरीफ शेख (वय २८, रा. पत्र्याची चाळ, न्यू नाना पेठ), खालिद खलील कुरेशी (वय १९, रा़ सय्यदनगर, हडपसर) यांना अटक केली असून त्यांच्या दोन साथीदारांवर खुनाचा प्रयत्न केल्याचा गुन्हा दाखल केला आहे. ही घटना मोची गल्लीतील उमर शेख यांच्या घरासमोर २३ एप्रिल रोजी पहाटे एक वाजण्याच्या सुमारास घडली. (Samarth Police Station)

याबाबत पोलिसांनी दिलेल्या माहितीनुसार, उमर शेख यांच्यावर ससून हॉस्पिटलमधील इमर्जन्सी वार्डमध्ये उपचार करण्यात येत असून पोलिसांनी हॉस्पिटलमध्ये जाऊन त्याची फिर्याद दिली आहे. खालिद कुरेशी याच्याशी उमर शेख याची ७ महिन्यांपूर्वी भांडणे झाली होती. दोघांनी एकमेकाविरुद्ध तक्रारी दिलेल्या होत्या.

उमर शेख हा ए डी कॅम्प चौकात २३ एप्रिल रोजी मध्यरात्री पाऊण वाजता उभा होता. त्यावेळी खालिद कुरेशी, दानिश शेख, सईद पठाण, हिदायत शेख हे एकत्र होप हॉस्पिटलजवळ उभे होते. खालिद याने बोटाने इशारा करुन उमर शेख याला बोलावले. त्याकडे उमर याने दुलर्क्ष करुन तो सेव्हन लव्हर्स चौकाकडून संत कबीर चौकाकडे जाणार्‍या मेनरोडवरुन मोची गल्ली मध्ये जाणार्‍या कोपर्‍यात मामा आरीफ मेमन यांना भेटला. तेथून तो मित्र आश्रफ कुरेशी याच्यासह मोची गल्लीतील घरी जात होता. गल्लीमध्ये खालिद कुरेशी व दोघे जण त्यांच्यासमोर आले. खालिद याने लोखंडी हत्यार काढले. हे पाहून उमर मोची गल्लीतील घराकडे पळाला. त्याच्या मागोमाग हल्लेखोर धावत आले. त्यांनी घरासमोर उमर याला पकडले. तेव्हा त्यांनी हातातील हत्यारे हवेमध्ये फिरवून परिसरामध्ये दहशत निर्माण केली.

त्यामुळे गल्लीमध्ये बसलेले लोक पळून गेले. खालीद याने आज “उमर को जिंदा नही रखेंगे, आज कल ये बहुत उड रहा है,” असे बोलला. त्यातील एकाने “आज तू जिंदा नही बचेगा” असे बोलून उमरवर धारदार हत्याराने वार केला. तो वार वाचविण्यासाठी उमरने हात मध्ये घातला. त्याचा वार मनगटावर लागला. खालिदने उमरच्या डोक्यावर वार केला. उमरचे मामा आरीफ मेमन यांनी खालिद कुरेशी याला पकडून उमरला सोडविण्याचा प्रयत्न केला. तेव्हा खालिद याने मामांना मारण्यासाठी हत्यार उगारले. ते पाहून मामाने मोठा भाऊ हैदरअली, शाकीर शेख यांना मोठ्याने आवाज देऊन बोलावले. तेव्हा ते पळून गेले. उमर शेख याला ससून रुग्णालयात दाखल करण्यात आले. पोलीस उपनिरीक्षक फडतरे तपास करीत आहेत.