पुणे : बहुजननामा ऑनलाइन – राज्यात कोरोना संसर्गाचा उद्रेक पहायला मिळत आहे. दिवसेंदिवस कोरोनाबाधितांची संख्या अधिकच वाढत आहे. दररोज मोठ्या प्रमाणात नवीन कोरोना बाधित आढळून येत आहे. या पार्श्वभूमीवर राज्य सरकारने कठोर निर्बंध लागू केले आहेत. राज्यातील प्रमुख शहरांमध्ये कोरोनाचा विळखा अधिक घट्ट होताना पहायला मिळत आहे. पुणे शहरामध्ये रुग्ण संख्या वाढत असताना मृत्यूंच्या संख्येतही वाढ होत आहे. त्यामुळे पुण्यात कठोर निर्बंध लागू केले असून, संसर्ग रोखण्यासाठी सर्वोतोपरी प्रयत्न सुरु आहेत. मात्र तरी देखील दररोज कोरोना बाधित रुग्णांच्या संख्येत मोठी भर पडत आहे. गेल्या 24 तासात शहरामध्ये 5 हजार 561 नवीन कोरोनाचे रुग्ण आढळून आले आहेत. तर 54 रुग्णांचा उपचारादरम्यान मृत्यू झाला आहे.
पुणे शहरामध्ये कोरोनाबाधितांच्या संख्येत वाढ होत असताना मृतांची संख्या वाढत असल्याने चिंता वाढली आहे. पुणे शहरात कोरोना बाधितांच्या एकूण रुग्ण संख्येने आज 3 लाखांचा टप्पा पार केला आहे. त्यामुळे एकूण रुग्णसंख्या 3 लाख 5 हजार 372 इतकी झाली आहे. पुणे शहरात दिवसभरात कोरोनामुळे 54 रुग्णांना जीव गमवावा लागला आहे. यामध्ये 41 रुग्ण शहरातील आहेत तर 13 रुग्ण शहराबाहेरील आहेत. आतापर्यंत 5 हजार 567 जणांचा कोरोनामुळे मृत्यू झाला आहे.
पुणे शहरात आज दिवसभरात 4 हजार 361 रुग्णांनी कोरोनावर मात केली आहे. पुणे शहरात रुग्ण बरे होण्याचे (रिकव्हरी) प्रमाण वाढत आहे. मात्र, मृत्यूंची संख्या वाढत असल्याने प्रशासनाची चिंता वाढली आहे. आज कोरोनामुक्त झालेल्या रुग्णांना रुग्णालयातून डिस्चार्ज देण्यात आला आहे. आजपर्यंत 2 लाख 53 हजार 734 रुग्ण कोरोनामुक्त झाले आहेत. आज (बुधवार) दिवसभरात शहरातील विविध केंद्रावर 26 हजार 120 स्वॅब तपासणी करण्यात आली. शहरात सक्रिय रुग्ण संख्या 46 हजार 071 इतकी आहे. त्यापैकी 957 रुग्ण गंभीर आहेत, अशी माहिती पुणे महानगरपालिकेच्या आरोग्य विभागाने दिली आहे.
