बहुजननामा ऑनलाइन टीम – पुण्यातील पूजा चव्हाण या तरुणीच्या कथित आत्महत्या प्रकरणाला राजकीय रंग चढू लागला आहे. या प्रकरणात शिवसेनेचे मंत्री संजय राठोड यांचे नाव समोर आल्यानंतर विरोधकांनी आक्रमक भूमिका घेतली आहे. संजय राठोड यांच्यावर गुन्हा दाखल करण्याची मागणी केली जात आहे. पूजा चव्हाण प्रकरणात संजय राठोड यांचा थेट हात असल्याचा आरोप भाजपने केला आहे. यानंतर शिवसेनेने सावध भूमिका घेत मंत्री संजय राठोड यांना तंबी दिली आहे.
शिवसेनेने संजय राठोड यांना माध्यमांशी बोलू नका, असे आदेश पक्षाकडून देण्यात आले आहेत. घटना गंभीर असल्यानं राठोड यांचे वक्तव्य आणखी अडचणी वाढवू शकतं, त्यामुळे पक्षाने सावध पवित्रा घेतला आहे. भाजप आक्रमक असताना राठोड यांच्या कुठल्याही वक्तव्यानं पक्षाची अडचण होऊ शकते, अशी माहिती सूत्रांकडून मिळाली आहे. राष्ट्रवादीचे मंत्री धनंजय मुंडे यांच्यावर आरोप झाल्यानंतर हे प्रकरण थोडे शांत झाले असतानाच आणखी एक मंत्री महिलेच्या प्रकरणात आडकल्याने सरकारच्या अडचणी वाढू शकतात.
राठोड यांच्यावर सदोष मनुष्यवधाचा गुन्हा दाखल करा – भाजप
पूजा चव्हाण आत्महत्या प्रकरणात शिवसेनेचे मंत्री संजय राठोड यांचा थेट हात असल्याचा आरोप भाजपने केला आहे. भाजपच्या नेत्या चित्रा वाघ यांनी तर थेट संजय राठोड याच्या मुसक्या आवळण्याची मागणी करत पोलिसांच्या भूमिकेवर प्रश्नचिन्ह उपस्थित केले आहे. पोलीस कोणाची वाट बघत होते, हातावर हात धरु का बसले होते ? सुमोटा अंतर्गत गुन्हा का नाही दाखल केला ? बार ऑडिओ क्लीप बाहेर आल्या त्या प्रत्येक क्लीपचा थेट रोख शिवसेना मंत्री संजय राठोड यांच्याकडे जातो. त्यामुळे त्यांच्यावर सदोष मनुष्यवधाचा गुन्हा दाखल करण्याची मागणी चित्रा वाघ यांनी केली आहे.
कोण आहे पूजा चव्हाण ?
पूजा चव्हाण (वय-22) ही तरुणी बीड जिल्ह्यातील परळी वैजनाथ येथील आहे. बीएचे शिक्षण पूर्ण केल्यानंतर स्पोकन इंग्लिश कोर्ससाठी ती पुण्यात आली. पुण्यात हडपसर परिसरात वास्तव्यास होती. पुण्यात आल्यानंतर दोनच आठवड्यात राहत्या इमारतीच्या तिसऱ्या मजल्यावरून उडी मारुन तिने आत्महत्या केली. यानंतर या प्रकरणात राज्य सरकारमधील शिवसेनेचे मंत्री संजय राठोड यांचे नाव समोर आले. संजय राठोड यांचे नाव समोर आल्यानंतर विरोधकांनी आक्रमक भूमिका घेत या प्रकरणाची सखोल चौकशी करण्याची मागणी केली. काल विरोधी पक्षनेते देवेंद्र फडणवीस यांनी पोलिस महासंचालक यांना पत्र पाठवून या प्रकरणाची सखोल चौकशी करण्याच्या मागणी केली.