बहुजननामा ऑनलाईन टीम – पूजा चव्हाण आत्महत्या प्रकरण चांगलंच तापलं आहे. गेल्या दोन दिवसांपासून जोरदार चर्चेत असणाऱ्या या प्रकरणात आता राष्ट्रीय महिला आयोगानं लक्ष घातलं आहे. त्यामुळं आता शिवसेनेचे वनमंत्री संजय राठोड यांच्या अडचणीत वाढ झाली आहे.
राष्ट्रीय महिला आयोगाला ट्विटरवर टॅग करत या प्रकरणी दखल घेण्याची विनंती करण्यात आली होती. यानुसार राष्ट्रीय महिला आयोगाच्या अध्यक्षा रेखा शर्मा यांनी यात लक्ष घातलं आहे. राष्ट्रीय महिला आयोगानं आता पुणे पोलिसांना चौकशी अहवाल सादर करण्याचे आदेश दिले आहेत.
रेखा शर्मा यांनी या प्रकरणी महाराष्ट्राच्या पोलीस महासंचालकांना आणि पुण्याच्या अतिरीक्त पोलीस आयुक्तांना पत्र पाठवलं आहे. पोलिसांनी लवकरात लवकर तपास अहवाल आयोगाला सादर करावा असं यात लिहिलं आहे. इतकंच नाही तर या प्रकरणी काय कारवाई केली हेही यात असावं असंही त्यांनी नमूद केलं आहे.
बीड जिल्ह्यातील परळी येथे राहणाऱ्या पूजा चव्हाण नावाच्या एका तरुणीनं पुण्यातील वानवडी येथील एका इमारतीच्या तिसऱ्या मजल्यावरून उडी मारून आत्महत्या केली. रविवारी ही घटना घडली होती. यानंतर आता या प्रकरणाला वेगळं वळण लाागलं आहे. ठाकरे सरकारमधील एका मंत्र्यामुळंच तरुणीनं आत्महत्या केल्याचा आरोप भाजपनं केला होता. यातील विविध ऑडिओ क्लीप देखील सोशलवर व्हायरल झाल्या आहेत. यानंतर आता राजकीय वर्तुळातही खळबळ उडालेली दिसत आहे. सुरुवातीला महाविकास आघाडीतील कथित मंत्र्याचं नाव घेतलं जात होतं. परंतु भाजपच्या महिला उपाध्यक्ष चित्रा वाघ यांनी थेट वनमंत्री संजय राठोड याचं नाव घेतल्यानं खळबळ उडाली आहे. पूजा सोशल मीडियावर खूप फेमस होती. त्यामुळं याचे पडसाद तिथंही उमटल्याचं दिसत आहेत. सोशलवर देखील निरनिराळ्या चर्चा सुरू आहेत.