बहुजननामा ऑनलाइन टीम – तीन वेगवेगळ्या ठिकाणी अज्ञात वाहनांनी दिलेल्या धडकेत तिघांचा मृत्यू झाला आहे. याप्रकरणी बुधवारी (दि.6) भोसरी एमआयडीसी, भोसरी आणि चाकण पोलीस ठाण्यात अज्ञात वाहन चालकाविरुद्ध गुन्हा दाखल (FIR)करण्यात आला आहे. तिनही घटनेत पादचारी व्यक्तींचा मृत्यू झाला आहे.
पुणे नाशिक रोडवरून जाणाऱ्या नरेश प्रकाश वाघमारे (वय-29 रा. मोशी) या तरुणाला अज्ञात वाहनाने धडक दिल्याने गंभीर जखमी होऊन त्याचा मृत्यू झाला. याप्रकरणी पोलीस हवालदार दीपक रणसौर यांनी भोसरी एमआयडीसी पोलीस ठाण्यात फिर्याद दिली आहे. हा अपघात बुधवारी रात्री एक ते दोनच्या सुमारास कल्पना हॉटेल समोर झाला.
शंकर वाघु दळवी हे त्यांच्या घराजवळ असलेल्या श्रीकृष्ण मंदिर येथे दर्शनासाठी जात असताना होंडा शाईन (एमएच 14 एचझेड 2456) दुचाकीने जोरात धडक दिली. यामध्ये गंभीर जखमी होऊन शंकर दळवी यांचा जागीच मृत्यू झाला. हा अपघात शनिवारी (दि.2) सायंकाळी सातच्या सुमारास संततुकाराम नगर भोसरी येथे झाला. याप्रकरणी रमेश शंकर दळवी (वय-40) यांनी भोसरी पोलीस ठाण्यात फिर्याद दिली आहे. पोलिसांनी होंडा शाईन दुचाकीस्वाराविरुद्ध गुन्हा दाखल केला आहे.
नाणेकरवाडी येथील शहा पेट्रोल पंपासमोरील सर्व्हिस रोडवरून पायी जाणाऱ्या मिथुन प्रल्हाद राठोड (वय-22 रा. शिक्षक कॉलनी, बालाजीनगर, मेदनकरवाडी, ता.खेड) याला अज्ञात वहानाने धडक दिली. यामध्ये मिथुन राठोड याच्या डोक्याला आणि चेहऱ्याला गंभीर दुखापत होऊन त्याचा जागीच मृत्यू झाला. याप्रकरणी पोलीस हवालदार संतोष बबन सुपेकर यांनी चाकण पोलीस ठाण्यात फिर्याद दिली आहे. हा अपघात मंगळवारी (दि.5) सायंकाळी सव्वापाच वाजता झाला.
