नाशिक : बहुजननामा ऑनलाइन – एका उद्योजकाने कारमध्येच रिव्हॉल्व्हरमधून स्वतःच्या डोक्यात गोळ्या झाडून आत्महत्या केल्याची खळबळजनक घटना समोर आली आहे. सटाणा शहराजवळ यशवंतनगर येथे बुधवारी (दि. 7) ही घटना घडली.
नंदलाल गणपत शिंदे (वय 55 रा. सामोडे, ता. साक्री, जि. धुळे, सध्या रा. सिडको, नाशिक) असे आत्महत्या केलेल्या उद्योजकाचे नाव असून ते कामटवाडा, नाशिक येथील मनसेचे नेते व महिंद्रा अँड महिंद्रामधील युनियनचे माजी पदाधिकारी असल्याचे समजते.
सटाणा पोलिसांनी दिलेल्या माहितीनुसार, नंदलाल शिंदे हे स्कोडा कारने (एमएच 15 – एफटी- 0133) सामोडे येथून नाशिककडे निघाले होते. ते ताहाराबाद रोडवरील यशवंतनगरजवळ आल्यानंतर त्यांचे मावसभावाशी फोनवर बोलणे झाले. माझी गाडी चालवण्याची परिस्थिती नसून, मी सटाणाजवळील जोगेश्वरी फर्टिलायझर्स समोर उभा असल्याचे सांगितले. हे ऐकल्यानंतर शिंदे यांचा मावसभाऊ व इतर दोघे नातेवाईक घटनास्थळी लगेच पोहचले, मात्र तेंव्हा शिंदे गाडीच्या ड्रायव्हर सीटवर रक्ताच्या थारोळ्यात पडले होते. घटनेची माहिती मिळताच सटाणा पोलीस ठाण्याचे पोलिस निरीक्षक नंदकुमार गायकवाड, सहाय्यक पोलीस निरीक्षक किरण पाटील, पोलीस हवालदार नवनाथ पवार, विजय वाघ घटनास्थळी दाखल झाले. पोलिसांनी प्रथम रिव्हॉल्व्हर ताब्यात घेतली. पोलिसांनी घटनास्थळी रुग्णवाहिकेला बोलवून शिंदे यांचा मृतदेह सटाणा ग्रामीण रुग्णालयात पाठवला आहे. सटाणा पोलीस तपास करत आहेत.
