बहुजननामा ऑनलाइन टीम – मुंबईकरांची लाइफलाइन असलेली लोकल सेवा आता सर्वांसाठी सुरू करण्याची मागणी राष्ट्रवादी काँग्रेसचे आमदार रोहित पवार( Rohit Pawar) यांनी केली आहे. आ. पवार यांनी मंगळवारी (दि. 13) मुंबईत परिवहनमंत्री अनिल परब यांची भेट घेऊन लोकल सुरू करण्याच्या मागणीसाठी केंद्राकडे पाठपुरावा करण्यासाठीचे पत्र त्यांना दिले आहे. आ. रोहित पवार यांनी परिवहनमंत्री परब यांच्या भेटीचे एक ट्विट देखील केले आहे.
राज्यात अनलॉकच्या टप्प्यात सर्व गोष्टी हळूहळू सुरू केल्या जात असताना मुंबईची लोकल मात्र अद्याप सर्वांसाठी सुरू झाली नाही. त्यामुळे चाकरमान्यांचे हाल सुरू आहेत. या पार्श्वभूमीवर मुंबईकरांच्या मदतीसाठी आमदार रोहित पवार यांनी पुढाकार घेऊन लोकल सेवा सुरु करण्याची मागणी केली आहे. मुंबईत लोकलअभावी सर्वांच्याच वेळेचा अपव्यय होऊन आर्थिक भुर्दंडही बसत आहे. मुंबईत एपीएमसीमध्ये गेलो असता माथाडी कामगारांनीही ही व्यथा मांडली. म्हणून सर्वांसाठी लोकल सुरू करण्याच्या मागणीचा मुख्यमंत्र्यांमार्फत केंद्राकडे पाठपुरावा करण्याचा विनंती परिवहन मंत्री अनिल परब यांच्याकडे केली, असे आ. पवार यांनी केेले आहे.
लोकल सुरू करण्याबाबत मुख्यमंत्रीही सकारात्मक
लोकल सेवा सर्वांसाठी खुली करण्यासाठी मुख्यमंत्री उद्धव ठाकरे देखील सकारात्मक विचार करत असल्याचे बोलले जात आहे. जानेवारीच्या मध्यापर्यंत मुंबई लोकल सर्वांसाठी सुरू करण्यासाठी सरकारच्या हालचाली सुरु असल्याचे बोलले जात आहे. मुंबईत सध्या अत्यावश्यक सेवेतील कर्मचारी आणि महिलांनाच लोकलमधून प्रवासाची परवानगी आहे.
