मुंबई : बहुजननामा ऑनलाईन – हैदराबाद बलात्कार प्रकरणाच्या विदारक आठवणी ताज्या असतानाच महाराष्ट्रातील अल्पवयीन मुलींवरील अत्याचाराच्या घटनांमुळे राज्यभरात संतापाची लाट उसळली आहे. संपूर्ण देश हैदराबाद महिला पशु वैद्य सामूहिक बलात्कार आणि हत्या प्रकरणामुळे हादरून गेला आहे. अशा परिस्थितीत महाराष्ट्रातील अल्पवयीन मुलींवरील अत्याचाराच्या घटनांमुळे राज्यभरात संतापाची लाट उसळली आहे.
नागपुरात चिमुकलीवर बलात्कार, दगडाने ठेचून हत्या
नागपूरच्या कळमेश्वरमध्ये अवघ्या ५ वर्षांच्या मुलीची दगडाने ठेचून हत्या करण्यात आली आहे. एका शेतात या मुलीचा मृतदेह आढळून आला आहे. या चिमुरडीवर अत्याचार झाल्याचं प्राथमिक अंदाज व्यक्त केला जात आहे. ही मुलगी गुरुवारपासून बेपत्ता होती. त्यानंतर संशयास्पद पद्धतीने तिचा मृतदेह आढळून आला. याप्रकरणी पोलिसांनी एका मुलाला चौकशीसाठी ताब्यात घेतलं आहे.
नाशिकमध्ये सात वर्षांच्या चिमुरडीवर अत्याचार
नाशिकमध्ये सात वर्षाच्या चिमुरडीवर लैंगिक अत्याचार झाल्याची संतापजनक घटना समोर आली आहे. अंबड परिसरात शेजारीच राहणाऱ्या एका भाडेकरूने खेळण्याच्या बहाण्याने या मुलीला घराबाहेर बोलावून तिला आपल्या घरी नेत तिच्यावर अत्याचार केला. काही वेळाने घरी आलेल्या मुलीने घडलेली हकीकत आपल्या आईला सांगताच हा सर्व प्रकार समोर आला. नातेवाईकांनी तात्काळ पोलिसांना या ठिकाणी पाचारण करत स्थानिकांच्या मदतीने 26 वर्षीय आरोपी कैलास कोकणीला पोलिसांच्या ताब्यात दिले.
जालन्यात अल्पवयीन मुलीचं अपहरण करून अत्याचार
जालन्यातून देखील अशीच एक घटना समोर आली आहे. १३ वर्षीय मुलीसोबत हिंगोलीत अत्याचार केल्याची घटना उघडकीस आली आहे. जालना शहरातील एका अल्पवयीन मुलीला विक्री करण्याच्या उद्देशाने तब्बल 23 दिवस हिंगोली जिल्ह्यातील सेनगाव येथे डांबून ठेवल्याचा खळबळ जनक प्रकार उघडकीस आला आहे. दरम्यान, तेरा वर्षांच्या मुलीला फुस लावून जालन्यातून अपहरण करण्यात आलं होतं. 23 दिवसांनंतर मुलीची पोलिसांनी सुखरुप सुटका केली.
बीड तालुक्यात अल्पवयीन मुलीवर बलात्कार
बीड तालुक्यातील मैंदा गावा मध्ये एका अल्पवयीन मुलीवर बलात्कार केल्याची घटना घडली आहे. आई वडील ऊसतोड मजूर असून ते गेल्या महीना भरात ऊसतोडणीसाठी गेले होते. अशातच ती आपल्या आजी-आजोबांसोबत राहत होती. रस्त्यावरून एकटी जात असताना त्याच गावात राहत असलेल्या अठरा वर्षीय तरूणाने बळजबरीने आपल्या घरात नेऊन तिच्यावर बलात्कार केला. आई-वडील कारखान्याहून परतल्यानंतर मुलीला घेऊन पिपंळनेर पोलीस ठाण्यात गुन्हा दाखल केला आहे. या प्रकरणातील आरोपी ज्ञानेश्वर मोमीन फरार आहे.
Visit : bahujannama.com