Maharashtra Politics News | शरद पवारांचे खासदार फोडण्यासाठी अजितदादांची खेळी; सुनील तटकरेंकडून 7 जणांना संपर्क

मुंबई: Maharashtra Politics News | उपमुख्यमंत्री अजित पवार यांनी शरद पवार (Sharad Pawar) यांच्या खासदारांना आपल्याकडे वळवण्याचा प्रयत्न सुरु केल्याची राजकीय वर्तुळात चर्चा सुरु आहे. सुनील तटकरे यांनी शरद पवार यांच्या ७ खासदारांना संपर्क करत सोबत येण्याची ऑफर दिल्याची माहिती आहे.

दरम्यान संपर्क झालेल्या सातही खासदारांनी सुनील तटकरे (Sunil Tatkare) यांची ऑफर नाकारली असल्याचे सांगण्यात येतेय. दरम्यान सुप्रिया सुळे यांनी प्रफुल पटेल यांना फोन करत तटकरे यांच्या बाबतची नाराजी व्यक्त केल्याची माहिती आहे. यामुळे पुन्हा एकदा राजकीय वर्तुळात चर्चांना उधाण आले आहे. (Ajit Pawar NCP)

शरद पवारांच्या खासदारांना आपल्याकडे वळवण्याची जबाबदारी अजित पवारांनी सुनील तटकरे यांच्या खांद्यावर सोपवली आहे. त्या जबाबदारीचा भाग म्हणून सुनील तटकरे यांनी सुप्रिया सुळे वगळता इतर सात खासदारांची भेट घेतली आणि त्यांना आपल्या सोबत येण्याची ऑफर दिली. तुम्ही सत्तेसोबत या, असे सुनील तटकरे यांनी या ७ खासदारांना सांगितले. या भेटी स्वतंत्रपणे घेण्यात आल्याची माहिती आहे.

या सातही खासदारांनी या भेटीची माहिती शरद पवारांना तसेच सुप्रिया सुळे यांना दिली. त्यानंतर मात्र सुप्रिया सुळे यांनी प्रफुल पटेल यांना फोन करून याबाबतची नाराजी व्यक्त केली. पुन्हा तुम्ही आमचा पक्ष फोडण्याचा प्रयत्न करत आहात का?,अशी विचारणा सुप्रिया सुळे यांनी प्रफुल पटेल यांच्याकडे केल्याचे कळतेय.

याबाबत माध्यमांशी बोलताना खासदार निलेश लंके म्हणाले, ” सुनील तटकरे यांच्याशी असा कुठलाही संपर्क झालेला नाही. हाऊसमध्ये गेल्यानंतर एकमेकांना भेटतो बोलतो मात्र राजकीय चर्चा झालेली नाही. कुठलीही ऑफर आलेली नाही आणि असा कुठला निर्णय होणार नाही”, असे लंके यांनी म्हंटले आहे.

अजित पवार गटाचे नेते अमोल मिटकरी म्हणाले, ” प्रदेशाध्यक्ष सुनील तटकरे हेच याबाबत माहिती देतील. दुसऱ्या पक्षाच्या खासदारांना पक्ष बदलायचा असेल तर प्रदेशाध्यक्षांशी चर्चा केली असेल. तुतारी गटाचे जे ७-८ खासदार निवडून आले आहेत. त्यांना जर खरंच आमच्यासोबत यायचे असेल तर सुनील तटकरेंसोबत संपर्क केला असेल. काही खासदार आणि काही आमदार सुरुवातीपासून आमच्या संपर्कात आहेत. जर कोणी येत असतील तर स्वागत आहे. त्याबाबत पक्षाचे राष्ट्रीय अध्यक्ष आणि प्रदेशाध्यक्ष निर्णय घेतील”, असे मिटकरी यांनी म्हंटले आहे.