नवी दिल्ली : वृत्तसंस्था – दहशतवादासाठी म्हणून ओळखल्या जाणार्‍या पाकिस्तानला फायनान्शियल ऍक्शन टास्क फोर्स (एफएटीएफ) च्या कारवाईबद्दल कमालीची भीती आहे. पंतप्रधान इम्रान खान यांचे म्हणणे आहे की, जर एफएटीएफने पाकिस्तानला काळ्या यादीत टाकले तर देशाची अर्थव्यवस्था उद्ध्वस्त होईल आणि पाकिस्तानी चलनात घसरणीचा सामना करावा लागेल. एका खासगी वृत्तवाहिनीशी बोलताना इमरान म्हणाले की, पाकिस्तानला एफएटीएफच्या काळ्या यादीत टाकले गेले, तर त्याची स्थिती इराणसारखी होईल. कोणीही आमच्याशी करार करणार नाही, कोणतीही आंतरराष्ट्रीय आर्थिक संस्था आम्हाला पाठिंबा देणार नाही.
अनेक संधी मिळाल्या आहेत
आपली भीती सांगताना इमरान खान म्हणाले की, ‘ब्लॅक लिस्ट झाल्याने आमच्या चलनावर परिणाम होईल. पाकिस्तानी रुपया खाली येईल आणि किती हे आम्हाला माहित नाही. आमच्याकडे पैशाची बचत करण्यासाठी परदेशी साठा नाही. जेव्हा रुपया खाली येईल, तेव्हा वीज, गॅस आणि तेल या सर्व गोष्टी महाग होतील. एकदा ब्लॅकलिस्ट झाल्यास महागाईमुळे आमची संपूर्ण अर्थव्यवस्था नष्ट होईल.’ गेल्या दोन वर्षांपासून पाकिस्तान एफएटीएफच्या ग्रे यादीमध्ये आहे. त्यांना आर्थिक करारात पारदर्शकता आणण्यासाठी आणि दहशतवादाच्या वित्तपुरवठ्यावर कारवाई करण्याच्या आश्वासनांची पूर्तता करण्यासाठी अनेक संधी मिळाल्या आहेत. एफएटीएफने अंतिम मुदत अनेक वेळा वाढवली आहे, पण प्रत्येक वेळी पाकिस्तान अपयशी ठरला आहे.
इथेही भारतावर लावला आरोप
त्यांनी आरोप लावला की, भारत त्यांना एफएटीएफमध्ये ढकलण्याचा प्रयत्न करत आहे. ते म्हणाले, ‘गेल्या दोन वर्षांपासून भारत पाकिस्तानवर एफएटीएफ बंदी घालण्याचा प्रयत्न करत आहे. गेली दोन वर्षे तो आंतरराष्ट्रीय समुदायासह आम्हाला काळ्या यादीत टाकण्याचा प्रयत्न करत आहे. ही बंदी घातल्यास पाकिस्तानची अर्थव्यवस्था उद्ध्वस्त होऊ शकते. आमची परिस्थिती इराणसारखी होऊ शकते, ज्यांच्याशी कोणत्याही आंतरराष्ट्रीय आर्थिक संस्थेला व्यवसाय करण्याची इच्छा नसेल.
कोरोनामुळे वाढली होती अंतिम मुदत
पॅरिसमधील फायनान्शियल ऍक्शन टास्क फोर्सची (एफएटीएफ) महत्वाची बैठक ऑक्टोबरमध्ये होणार आहे, त्यात पाकिस्तानींविरूद्ध कारवाईचा निर्णय होईल. एफएटीएफने पाकिस्तानला ग्रे यादीत टाकले आहे आणि त्यांना २०१९ च्या अखेरपर्यंत दहशतवाद्यांना रोखण्यासाठी योजना लागू करण्यास सांगितले होते, पण कोरोना महामारीमुळे त्याची मुदत नंतर वाढवण्यात आली.
वर्षाकाठी इतके नुकसान
गेल्या वर्षी एफएटीएफने पाकिस्तानला सांगितले होते की, त्या सर्व दहशतवाद्यांसाठी आर्थिक प्रतिबंधाची माहिती द्या, ज्याचा उल्लेख संयुक्त राष्ट्राने केला आहे. यात पुलवामा हल्ल्याचा मुख्य सूत्रधार मसूद अझहर आणि १९९३ च्या मुंबई बॉम्बस्फोटांचा मुख्य सूत्रधार दाऊद इब्राहिम यांचा समावेश आहे. पाकिस्तान सरकारनुसार, एफएटीएफने ग्रे यादीत टाकल्यामुळे पाकिस्तानला वर्षाला सुमारे १० अब्ज डॉलर्सचे नुकसान होत आहे.
