बहुजननामा ऑनलाइन टीम – तुम्ही माझ्यामागे ईडी लावली तर मी तुमची सीडी लावेन, असे मागे मी गमतीने बोललो होतो. मात्र आता खरोखरच त्यांनी माझ्या मागे ईडी लावली आहे. त्यामुळे आता मला सीडी लावावीच लागेल. सीडी लावण्याचे काम आता बाकी आहे, असे राष्ट्रवादीचे नेते एकनाथ खडसे यांनी कोणाचे नाव न घेता भाजपला इशारा दिला आहे.
भाजपचे माजी मंत्री गिरीश महाजन यांच्या मतदार संघात जामनेर येथे जयंत पाटील यांच्या उपस्थितीत झालेल्या राष्ट्रवादीच्या कार्यक्रमात बोलताना खडसे यांनी कोणाचे नाव न घेता भाजपला इशारा दिला. भाजपला सोडचिठ्ठी देऊन राष्ट्रवादी काँग्रेस पक्षात प्रवेश केल्यानंतर बोलताना एकनाथ खडसे यांनी ईडी लावली तर मी सीडी लावेन असे म्हटले होते. त्यानंतर आता प्रत्यक्षात ईडीकडून त्यांची चौकशी सुरु आहे. त्यामुळे आता मी सीडी लावण्याचे काम करणार आहे, असे सांगत खडसे यांनी मोठ्या गौप्यस्फोटाचे पुन्हा एकदा संकेत दिले आहेत.
राज्याचे जलसंपदा मंत्री व राष्ट्रवादी काँग्रेसचे प्रदेशाध्यक्ष जयंत पाटील यांची राष्ट्रवादी परिवार संवाद यात्रा सुरु आहे. सध्या ते जळगाव जिल्ह्यात आहेत. या दौऱ्यादरम्यान जामनेर येथे संवादाचा कार्यक्रम आयोजित करण्यात आला होता. या कार्यक्रमात बोलताना एकनाथ खडसे यांनी ईडी चौकशीवरुन भाजपवर जोरदार निशाणा साधला.
#राष्ट्रवादीपरिवारसंवाद यात्रेच्या आज १५व्या दिवशी जळगाव जिल्ह्यातील जामनेर विधानसभा मतदारसंघात शेवटची आढावा बैठक सुरु आहे. रात्रीच्या १२ वाजता देखील कार्यकर्ते मोठ्या संख्येने उपस्थित असून ते माजी मंत्री @EknathGKhadse यांच्या भाषणाला उस्फुर्त प्रतिसाद देत आहेत. @Jayant_R_Patil pic.twitter.com/OHztoBtOz7
— NCP (@NCPspeaks) February 11, 2021