बहुजननामा ऑनलाइन टीम – राष्ट्रवादीचे नेते आणि राज्याचे सामाजिक न्यायमंत्री धनंजय मुंडे(Dhananjay Munde) यांच्यावर बी टाऊनची गायिका रेणू शर्मा यांनी बलात्काराचे आरोप करत त्यांच्याविरुद्ध तक्रार दाखल केली आहे. या तक्रारीनंतर सर्वत्र एकच खळबळ उडाली. दरम्यान, आता भाजपचे प्रदेशाध्यक्ष आमदार चंद्रकांत पाटील यांनी धनंजय मुंडे(Dhananjay Munde) यांच्या राजीनाम्याची मागणी केली आहे.
ट्विटरवरुन मुंडे यांच्यावर निशाणा साधत पाटील म्हणाले, सामाजिक न्यायमंत्री असलेल्या धनंजय मुंडे यांनी आपल्या चुकीच्या कृत्याबद्दल तत्काळ राजीनामा द्यायला हवा. मुंडे यांच्यावरील लैंगिक शोषणाचे आरोप पाहता त्यांना मंत्रिपदावर राहण्याचा कोणताही अधिकार नाही. भारतीय जनता पार्टीच्या महिला शाखेच्या वतीने एक पत्रक प्रसिद्ध करण्यात आले असून, मुंडे यांच्या राजीनाम्याची मागणी केली आहे आणि आम्ही आता या विषयी आणखी जोरदार मागणी करणार आहोत.
लैंगिक शोषणाचे आरोप असलेल्या @dhananjay_munde यांनी तात्काळ राजीनामा द्यावा ! @OfficeofUT @PawarSpeaks pic.twitter.com/PVrlONAoBb
— Chandrakant Patil (@ChDadaPatil) January 13, 2021
ज्या व्यक्तीवर अशा प्रकारचे आरोप होतात, त्याला या पदावर राहण्याचा कोणताही नैतिक अधिकार नसतो. मात्र, गेंड्याच्या कातडीचे मंत्री आणि महाविकास आघाडीचे सरकार याबाबत आत्मपरिक्षण करून मुंडेंचा राजीनामा घेतील, असे वाटत नाही. पण तरीही मुंडे यांनी या पदाचा राजीनामा द्यावा, अशी आमची मागणी आहे, असेही त्यांनी म्हटले आहे. तसेच याप्रकरणी भाजपच्या वतीने आम्ही राज्यभर आंदोलन करणार असल्याचा इशाराही त्यांनी दिला आहे