बहुजननामा ऑनलाईन टीम : माजी ग्रामविकास मंत्री पंकजा मुंडे यांच्या मनधरणीसाठी भाजपाकडून धावपळ सुरू असल्याचे चित्र आहे. फेसबुकवर पंकजा यांनी नाराजी व्यक्त केल्यानंतर १२ डिसेंबर रोजी त्या घोषणा करतील अशी शक्यता व्यक्त केली जात आहे. राज्यात उद्धव ठाकरे यांच्या नेतृत्वाखाली महाविकास आघाडीचे सरकार आल्याने आधीच भाजपला धक्का बसला आहे. त्यामध्ये पंकजा मुंडे नाराज असल्यामुळे त्यांची ही नाराजी पक्षाला परवडणारी नाही त्यामुळे त्यांची नाराजी दूर करण्यासाठी आता देवेंद्र फडणवीस प्रयत्न करत आहे.
आपल्या पराभवाला पक्षातलेच नेते कारणीभूत असल्याचे पंकजा मुंडे यांनी सुत्रांना सांगितले आहे. त्यांची नाराजी ही देवेंद्र फडणवीसां विरुद्ध असल्याची चर्चा आहे. त्यामुळे बंडाचा झेंडा तर उभारणार नाहीत ना याबद्दलही अंदाज व्यक्त केला जात होता. त्यामुळे आता स्वतः देवेंद्र फडणवीस यांनीच पंकजा मुंडे यांना फोन करुन चर्चा केल्याची माहिती पुढे आली आहे. त्या दोघांमध्ये विविध राजकीय विषयांवरच चर्चा झाल्याची माहिती सुत्रांनी दिली आहे.
माजी मंत्री विनोद तावडे, बबणराव लोणीकर, राम शिंदे यांनी आज पंकजा मुंडे यांची त्यांच्या निवासस्थानी जाऊन भेट घेतली. पंकजा मुंडे यांची नाराजी दूर करण्यासाठी ही भेट असल्याचे सांगितले जात आहे. मात्र, पंकजा मुंडे यांना अद्यापही या सगळ्या प्रकरणावर अधिकृत प्रतिक्रिया व्यक्त केलेली नाहीये. १२ डिसेंबरला गोपीनाथ मुंडे यांची जयंती असून गोपीनाथ गडावर मेळावा घेऊन पंकजा मुंडे शक्तिप्रदर्शन करण्याची शक्यता व्यक्त केली जात आहे.
Visit : bahujannama.com
