नवी दिल्ली : वृत्तसंस्था – दिल्ली हिंसाचारात मारले गेलेले आयबीचे कर्मचारी अंकित शर्मा यांचा पोस्टमॉर्टम रिपोर्ट आला आहे. पोस्टमॉर्टम रिपोर्टमध्ये अंकित शर्मा यांच्या शरीरावर चाकूचे घाव असल्याचा खुलासा झाला आहे. अंकित यांच्या पोटात आणि छातीत चाकूचे घाव आढळून आले. संपूर्ण शरीरावर चाकूचे अनेक घाव आहेत. अतिशय निर्दयीपणे त्यांची हत्या करण्यात आली. पोस्टमार्टम रिपोर्टमधील अहवालानुसार अंकित यांच्या शरीरावर चाकूने तब्बल 18 वार झाले होते. दरम्यान, AAP चे नगरसेवक ताहिर हुसैन यांची हकालपट्टी केली आहे.
अंकित शर्मा यांच्या हत्येचा आरोप आम आदमी पार्टीचे नगरसेवक ताहिर हुसैन यांच्यावर आहे. गुरुवारी त्यांच्याविरूद्ध हत्या, जाळपोळ आणि हिंसा पसरवण्याचा गुन्हा दाखल झाला आहे.
अंकित शर्मा यांच्या कुटुंबियांनी काय म्हटले
अंकित शर्मा यांच्या कुटुंबियांनी ताहिर हुसैन यांना मृत्यूसाठी जबाबदार धरले आहे. कुटुंबानुसार, अचानक बाहेरून शेजारी राहणार्या एका कुटुंबाचा मदतीसाठीचा आक्रोश ऐकू आला. हा आवाज ऐकून अंकित मदतीसाठी बाहेर आला.
अंकितच्या आईने त्याला थांबवले सुद्धा, परंतु त्यांनी आईचे ऐकले नाही. अंकित त्यावेळेस घरातून बाहेर पडले, ते पुन्हा आले नाहीत, त्यांचा मृतदेहच घरी आणण्यात आला. तोसुद्धा जवळच्या नाल्यातून ताब्यात घेण्यात आला. तर, ताहिर हुसैन यांचे म्हणणे आहे की, अंकित यांच्या मृत्यूने ते दु:खी आहे. मी अंकित यांच्या कुटुंबियांसोबत आहे. दंगलखोर कुणाचेही नसतात. मला माहित नाही, घराच्या छप्परावरून कोण दगड आणि पेट्रोल बॉम्ब टाकत होते.
आरोपी ताहिर हुसैन यांच्या अडचणी वाढल्या
याप्रकरणी गुरूवारी आरोपी ताहिर हुसैन यांच्या विरूद्ध हत्या, जाळपोळ आणि हिंसा पसरवण्याचा गुन्हा दाखल करण्यात आला. हा गुन्हा दयालपुर पोलीस ठाण्यात दाखल झाला आहे. तर, आम आदमी पार्टीने ताहिर हुसैन यांच्यावर कारवाई केली आहे. पक्षाने त्यांना निलंबित केले आहे. यापूर्वी दिल्ली पोलीसांनी मोठी कारवाई करत ताहिर हुसैन यांचे खजूरी परिसरातील घर सील केले. ताहिर हुसैन यांच्या घराच्या छतावर दगड, अॅसिड आणि पेट्रोल बॉम्ब सापडले आहेत. येथूनसुद्धा दगडफेक झाल्याचा आरोप आहे.
एएपी नगरसेवकाच्या घराच्या छप्परावर दगड आणि पेट्रोल बॉम्बने भरलेल्या टोपल्या मिळून आल्या. एवढेच नव्हे तर सोशल मीडियावर एक व्हिडिओ वायरल होत आहे, ज्यामध्ये काही दंगलखोर एका घराच्या छप्परावरून दगड आणि पेट्रोल बॉम्ब खाली फेकताना दिसत आहेत. ज्या घराच्या छप्परावरून हा हल्ला केला जात आहे, ते घर ताहिर हुसैन यांचे असल्याचे सांगितले जात आहे.