बहुजननामा ऑनलाइन टीम – नवी दिल्ली : काँग्रेस नेते गुलाम नबी आझाद यांचा राज्यसभेतील सदस्यत्वाचा कार्यकाल पूर्ण होत आहे. त्यानुसार, त्यांच्याकडे असलेल्या विरोधी पक्षनेते पदावर कोण याचीच चर्चा काँग्रेसमध्ये होती. मात्र, काँग्रेसने आझाद यांच्यानंतर विरोधी पक्षनेतेपदी कोण असेल, याची घोषणाही केली. पक्षाचे ज्येष्ठ नेते मल्लिकार्जुन खर्गे यांची राज्यसभेच्या विरोधी पक्षनेतेपदी निवड केली आहे.
काँग्रेसचे सरचिटणीस वेणूगोपाल यांनी सांगितले, की काँग्रेसने राज्यसभा सभापती व्यंकय्या नायडू यांना काँग्रेसकडून विरोधी पक्षनेतेपदी मल्लिकार्जुन खर्गे यांची निवड केल्याची माहिती दिली आहे. या पदासाठी काँग्रेसचे ज्येष्ठ नेते आणि राज्यसभेतील विरोधी पक्ष उपनेते आनंद शर्मा हेदेखील उत्सुक होते. पण काँग्रेस पक्ष संघटनेवर अनेक सवाल उपस्थित करत सोनिया गांधी यांना पत्र लिहिल्यानंतर पक्ष नेतृत्वाकडून त्यांच्या नावाला पाठिंबा दिला जात नव्हता. तसेच मल्लिकार्जुन खर्गे यांना राहुल गांधी यांचे अत्यंत जवळचे मानले जाते. त्यातूनच ही निवड केल्याचे बोलले जात आहे.
2019 लोकसभा निवडणुकीत पराभव
मल्लिकार्जुन खर्गे यांनी 2019 मध्ये लोकसभेची निवडणूक लढवली होती. मात्र, त्यावेळी त्यांचा पराभव झाला होता. खर्गे यांचा पराभव होऊनही पक्षाने त्यांना राज्यसभेत पाठविले.
15 फेब्रुवारीला होणार कार्यकाल पूर्ण
गुलाम नबी आझाद यांचा 15 फेब्रुवारीला राज्यसभेच्या सदस्यत्वाचा कार्यकाल पूर्ण होत आहे. त्यापूर्वीच आता विरोधी पक्षनेते पदावर कोण असेल याची घोषणा काँग्रेसकडून करण्यात आली आहे.
