नवी दिल्ली : वृत्तसंस्था – कोरोना संकटात देशात कॅशलेस ट्रांजक्शन वेगाने वाढत आहे. ट्रांजक्शनमध्ये क्रेडिट आणि डेबिट कार्डचे व्यवहार सुद्धा वाढले आहेत. अशावेळी यामध्ये फसवणुकीच्या प्रकरणांमध्ये सुद्धा वाढ झाली आहे. डेबिट किंवा क्रेडिट कार्डद्वारे फसवणुकीने सायबर गुन्हेगार तुमचे बँक खाते रिकामे करू शकतात. जर तुमच्या बाबतीत असे घडले तर जाणून घ्या काय करावे आणि कुठे करावी तक्रार…
जर तुम्हालाही तुमच्या डेबिट आणि क्रेडिट कार्डच्या व्यवहाराबाबत शंका असेल तर जो तुम्ही केलेला नाही, तर कोणताही उशीर न करता बँकेकडे तक्रार करा. प्रत्येक बँकेने यासाठी वेगवेगळे नंबर्स जारी केले आहेत, ज्यावर कॉल करून या व्यवहाराची तक्रार करा, सोबतच आपले कार्ड ब्लॉक करू शकता.
अशी करा तक्रार
क्रेडिट कार्ड किंवा डेबिट कार्डबाबतचच्या फ्रॉडची तक्रार करताना तुमच्याकडे ही माहिती असणे आवश्यक आहे. संबंधित बँकेचे मागील सहा महिन्याचे स्टेटमेंट घ्या. संशयास्पद ट्रांजक्शन संबंधित प्राप्त झालेल्या एसएमएसची एक कॉपी बनवा. बँकेचे पासबुक सांभाळून ठेवा. बँकेच्या रेकॉर्डनुसार, आयडी प्रूफ आणि ए़ड्रेस प्रूफची कॉपी ठेवा. या कागदपत्रांसह आपल्या जवळच्या पोलीस ठाण्यात जाऊन संपूर्ण देऊन तक्रार दाखल करा.
बँकेतून आलेला फोन खरा की खोटा?
बँक कधीही आपल्या ग्राहकांना फोन करून त्यांची खासगी माहिती पासवर्ड किंवा वन टाइम एसएमएस पासवर्ड बाबत विचारत नाही. याच्यातून ग्राहकाच्या खात्यातून इंटरनेट बँकिंगद्वारे फसवणूक करून पैसे काढले जातात. अशा फोन कॉलला उत्तर देऊ नका. जर तुमच्याकडून कुणी माहिती मागत असेल तर तो फ्रॉड कॉल आहे, हे ओळखा.
अॅपद्वारे फ्रॉडच्या स्थितीत काय करावे
फसवणूक करण्यासाठी काही बनावट अॅपसुद्धा उपलब्ध आहेत. जर तुमची एखाद्या अशा अॅपकडून फसवणूक झाली तर, तुम्ही या कागदपत्रांसह त्या बनावट अॅपचे स्क्रीनशॉट घ्या. सोबतच ज्या ठिकाणाहून ते डाऊनलोड केले, त्याची माहिती पोलिसांना द्या.
याशिवाय क्रेडिट किंवा डेबिट कार्डच्या फ्रॉडपासून वाचण्यासाठी फोन, एसएमएस किंवा ईमेलवर मागण्यात आलेली वन टाइम पासवर्ड (ओटीपी), क्रेडिट/डेबिट कार्ड नंबर, कार्डचा सीव्हीव्ही नंबर, एक्सपायरी डेट, सिक्युर पासवर्ड आणि एटीएम पिनची माहिती देऊ नका.