बहुजननामा ऑनलाइन टीम – लग्नसमारंभाला चाललेल्या लक्झरी बसचा( luxury bus accident) महाड-पंढरपूर राज्यमार्गावरील आकले गावाच्या परिसरात अपघात झाला. चालकाचे नियंत्रण सुटल्याने पहाटे एक वाजण्याच्या सुमारास (एमएच. ०४ एफ के. ०४५२) ही बस पलटी झाली. त्यात पंधरा प्रवाशी जखमी झाले. जखमी प्रवाशांवर महाड एमआयडीसी रुग्णालय व शहरातील रानडे ॲक्सिडेंट हॉस्पिटल येथे उपचार करण्यात येत आहेत.
याबाबत मिळालेली माहिती अशी की, महाड तालुक्यातील खरवली गावातून लग्नसमारंभा साठी कोल्हापूरला जाणाऱ्या लक्झरी बसच्या चालकाचे नियंत्रण सुटल्याने बस उलटली. त्या अपघातात बसमधील १५ प्रवाशांच्या डोक्याला, हाता-पायाला मार लागला. घटनेची माहिती मिळताच महाड एमआयडीसी पोलीस ठाण्याचे प्रभारी अधिकारी पंकज गिरी व त्यांच्या सहकाऱ्यांनी तात्काळ धाव घेत अपघातास कारणीभूत असलेल्या लक्झरी बस चालकास ताब्यात घेऊन त्याच्याविरोधात गुन्हा नोंद करण्याची प्रक्रिया सुरु केली आहे.
दैव बलवत्तर म्हणून…
दुर्घटनाग्रस्त लक्झरी बसमध्ये अंदाजे ५० प्रवासी होते. मात्र, दैव बलवत्तर म्हणून मोठी दुर्घटना टळली. या अपघातात चार महिन्यांचे बाळ सुखरुप बचावले. जखमी प्रवाशांची प्रकृती स्थिर असून, अपघातास जबाबदार असणाऱ्या लक्झरी बस चालकास स्थानिक नागरिकांनी पोलिसांच्या ताब्यात दिले आहे.
